7月意味着夏天、放假、玩水，東京迪士尼40週年的夏季節目，由7月初開始，各卡通人物準備同大家一齊玩水戰，花車巡遊新增Baymax主題花車，邊行邊噴水，為大家降溫，另外Duffy & Friends將在Disney Sea登船為大家表演《Harbor Show》，仲有唔少得濕身機動遊戲，好玩到癲！
東京迪士尼的夏季宣傳海報提提大家，「終於，一齊放暑假」，大人小朋友一起盡情去玩的夏天，園區由7月初起，大搞「夏季水派對」，除了機動遊戲增設濕身環節外，今年花車巡遊仲有超巨型Baymax登場，發放水氣，又有水柱攻擊，而毛茸茸的Duffy and Friends就抵受住炎夏，同大家載歌載舞，仲有期間限定的刨冰特飲。即買飛，齊齊去開party！
今季的盛大花車巡遊，動畫《大英雄天團》（Big Hero 6）中的肥肥白白機械人Baymax首次登場，Baymax坐上其花車，發放溫柔的水氣噴霧，失驚無神又以水柱作近距離攻擊，清涼消暑至極。
地點：東京迪士尼樂園
每日3次、每場35分鐘
Duffy and Friends就在Disney Sea，乘船登場表演全新歌舞《Harbor Show》，Duffy、ShellieMay、Gelatoni、StellaLou聯同首次登場的CookieAnn、Olu Mel、LinaBell邊唱邊跳，非常可愛。
地點：東京迪士尼海洋
每日2次、每場10分鐘
另外無軌設計的「水上逗趣船」，時快時慢，更會突然轉彎、打轉，夏日的路線，會加設水簾、水柱等，增加刺激度；「濕身MAX」的水量加大，車上兩側追加噴水裝置，由16米高處往水底俯衝時，仲有360度無死角的水花，終極濕透；而「鱈魚岬錦標美食」餐廳內，可以邊用餐，邊看Duffy and Friends可愛表演，但要留意需事先訂位。
